نيفا

الموضوع دة ببساطة عن تابلوه العربية النيفا

النيفا عربية مافهاش أى تعقيد كل شئ فيها واضح و دى هى فكرة الصناعات فى روسيا بأستمرار 

عمل معدة قوية و للخدمة الشاقة و قطع غيار بسيطة الثمن و وزنها ثقيل جدا و دة لحكمة مهمة 

أنها تكون متزنة و ثابتة على الارض بدون الحاجة لتكنولوجيا متطورة تزود من سعر السيارة زى العربيات الالمانية

لو نبص على الصورة نلاقى ان الخمس عدادات بالترتيب من اليمين للشمال 

صورة لتابلوه نيفا موديل 1983

1_  امبير الحرارة أو عداد الحرارة و هو له 3 درجات 50 و دى طبعا البداية و 90 و دى طبعا لازم ننتبه ليها عشان ما تعلاش أكتر و تجيب جوان و لا ما شاء الله وش سلندر و تخش فى دوامة و أسبوع عطلة عند الميكانيكى دة غير الفلوس يجى 400 بلبل و حظك اسود لو كان وش السلندر مقفع و محتاج قشط تروح تقشط ب 200 جنية  عند مختار تحت كوبرى التجنيد تلاقى أن الوش اتقشط قبل كدة و مش هينفعله قشط لو الميكانيكى ابن حلال ممكن يحطلك جوانين لكن ممكن ما فيش حاجة تنفع و تضطر تشترى وش سلندر جديد من الوكالة ولا الحرفيين و لا عزبة شلبى
و طبعا مؤشر الحرارة الدرجة القصوى فيه 130 و دى لو انت شفتها يستحسن تعدى على اول ميكانيكى

2_ امبير السرعة و هو سرعته القصوى 180 كيلو متر ساعة لكن ما يستحسنش تجرب السرعة دى بعربية مستعملة فى مصر

3_ عداد RBM ار بى أم ( Round per minute) يعنى عدد لفات موتور العربية فى الدقيقة و طبعا عدد اللفات فى الامبير بيبتدى من 10 و بينتهى عند 80 ( الارقام دى بتكون مضروبة فى 100) و طبعا فى علامة حمراء لما عدد اللفات بيعدى 6000 لفة فى الدقيقة

4_ امبير البنزين و بالمناسبة التانك بيكون 41 من المصنع لكن فى مصر فى عفريت بيخلى التانك 40 او 39 لتر بس

5_ أمبير الزيت

عموما لاى حد عاوز يشترى تابلوه كامل للنيفا على عزبة شلبى و شوف الاسعار بس ياريت تروح مع حد فاهم لانك لو رحت لوحد هتتظبط يا جميل

دى طبعا صورة ارشيفية لكن و الله عملت بعربيتى زيها 

و دى صورة لابعاد العربية النيفا بالسنتيمتر

أتمنى أنى اكون قدمت حاجة بسيطة عن النيفا حبيبتى