مشكلة تقل دريكسيون النيفا

مشكلة تقل دريكسيون النيفا

مشكلة الدركيسون التقيل فى النيفا مشكلة عامة على كل عربيات اللادا مش النيفا و بس
و عموما اسباب المشكلة دى هى 

1 ضبط الكاوتش

 كل مقاس للكاوتش و ليه درجة ضبط معينة و لو الاربع عجلات الهوا فيهم مش مظبوط هتلاقى العربية بتعمل اصوات غريبة كأن العفشة بايظة
و طبعا اللى مشاويره كتير و بيعملها الصبح فى درجة حرارة عالية يكشف كل اسبوع على الاقل على ضغط الكاوتش لانه بيزيد جدا مع ارتفاع درجة الحرارة ممكن تكون ظابط الكاوتش على 31 و تلاقى بعد اسبوعين 37 حاجة نادرة لكن بتحصل و طبعا مش قاعدة ان الاربع فرد يزيد الضغط فيهم بنفس النسبة و لو فردة من قدام زادت عن التانية مش بس الدريكسيون هو اللى هيتقل لا انت هتحس انك محتاج ظبط زويا لكن بمجرد ما تظبط الكاوتش هتحس بالفرق

2 علبة الدريكسيون 

طبعا دي مشكلة ازلية فى اللادا لكن اللى يشترى نيفا لازم يكون فاهم انها اصلا معمولة عشان السواقة فى الطرق الوعرة و غير الممهدة فلازم الدريكسيون يكون تقيل شوية 
لكن لو اتقل من اللازم يا اما يتغير بعلبة دريكسيون مازدا يا اما تجيب الروسى من عند حمدى لادا من اى فرع او ملك اللادا اللى فى شارع هارون فى مصر الجديدة

3  شغل العفشة

طبعا كل الطرق فى مصر حالتها تبوظ عفشة اى عربية و كمان عدم كفاءة الصنايعية فى الشغل و جملتهم المشهورة انا هأعدلك
اول ما تسمع حد بيقول هاعدلك خد عربيتك و اجرى
عموما العفشة ككل طقم البيض و طقم السوست و البارات كلها تتلم بحوالى 500 جنية

4 عيوب اخرى

خبطات قديمة مؤثرة على الشاسية

ضبط الزوايا و الاتزان مهمة جدا لكل العربيات بلاش تروح لعفشجى قبل ما تكشف على الزوايا و يعمل عليك حوار

ممكن تكون واحدة من الفرد القدامانية الفرامل قافشة فيها شوية لكن دى عيوب ممكن تظهر فى اى عربية مش اللادا النيفا و بس و انا كتبتها لمجرد الملاحظة